УИХ-ын Төрийн байгуулалтын байнгын хорооны хуралдаанаар Засгийн газрын бүтэц, бүрэлдэхүүний тухай хуулийн төслийг хэлэлцэхэд  УИХ-д суудалтай бүх нам, эвслийн бүлэг, бие даагч гишүүдийн төлөөлөл оролцсон юм. УИХ-ын хуралдаануудад удтал оролцохгүй байсан МАН-аас гишүүн  Н.Энхболд, Д.Лүндээжанцан, Я.Содбаатар нар оролцсон нь содон байлаа. Н.Энхболд гишүүн агентлагийн тоог цөөлж байгаа ч яамны тоо нэмэгдэж байна. Агентлагийн хариуцаж байсан аж ахуйн чанартай ажил яаманд шилжсэнээр улс төр бизнес хоёр холилдох нь гэсэн  шүүмжлэл хэлсэн ч Ерөнхий сайд Н.Алтанхуяг “Хариуцлагыг өндөржүүлэх шаардлагатай байна. Лиценз тендер хариуцсан агенлагийн дарга хариуцлагагүй байхад сайд нь энд хариуцлага хүлээж байх ёстой. Ийм л учраас ингэж шийдэх хэрэгтэй байгаа юм. Тэгэхээр улс төр бизнес хоёр холилдохгүй” гэсэн хариу өглөө. Засгийн газрын бүтэц, бүрэлдэхүүний тухай хуулийн төслийг Төрийн байгуулалтын байнгын хорооны гишүүд  100 хувь дэмжсэн тул одоо УИХ-ын чуулганы нэгдсэн хуралдаанаар хэлэлцээхр шийдвэрлэлээ.  Засгийн газрын бүтэц, бүрэлдэхүүний тухай энэ хуулийг хэлэлцсэнээр 26 хуульд нэмэлт, өөрчлөлт оруулахыг гишүүд мөн санал нэгтэй мөн дэмжлээ.