”Кармен” дуурийн Кармен, “Трубадур” дуурийн Азученагийн дүрээр үзэгчдийн сэтгэлд хоногшсон ДБЭТ-ын гоцлол дуучин, Монгол Улсын Соёлын тэргүүний ажилтан Д.Долгормаа ОХУ-ын Буриад улсын Ардын жүжигчин болжээ. Дорнод нутгийн уугуул түүнийг Буриад зоны урлаг, соёлын өв хөгжилд үнэтэй хувь нэмэр оруулсныг нь үнэлэн саяхан болсон “Алтаргана 2012” наадмын үеэр Буриад улсын Ардын жүжигчин цолоор шагнажээ. Тэрээр 2006 онд Буриадын Гавьяат жүжигчин цол хүртсэн юм. Дуучин Д.Долгормаа тун удахгүй “Алтаргана” наадмын үеэр олны хүртээл болгосон дуунуудыг түүвэрлэн, ном гаргахаар зэхэж байгаа гэнэ. Түүний товхимол 50-60 дуутай байх ба Буриад дууг хойч үедээ өвлүүлэхэд чиглэсэн аж. Тэрээр өөрийнхөө хойч үеэ бэлдэхээр Хөгжим бүжгийн коллежийн Дуулах ур чадварын тэнхимд багшаар ажиллаж байна.