Шүүгдэгч Н.Энхбаярын өмгөөлөгч С.Нарангэрэл, О.Сайнгэрэл нар улсын яллагчийн яллах саналд шүүмжийн үгээ хэллээ. Тэд Н.Энхбаярыг буруутгаж буй таван үндэслэл нь гэмт хэргийн бүрэлдэхүүнгүй учир хэрэгсэхгүй болгож, цагаатгах ёстой гэв. Тэгээд ч түүнд ял төлөвлөж, буруутгасан хуулийн зүйлчлэл ч тохироогүй, буруу гэж шүүмжиллээ. Тухайлбал, Н.Энхбаярт Эрүүгийн хуулийн 150,3-т зааснаар бусдын эд хөрөнгийг завшсан гэж ял төлөвлөж байна. Хуулийн энэ заалтад бусдын эд хөрөнгийг эрхлэн хариуцдаг хүнд л хариуцлага тооцно гэж зааж өгсөн байгаа. Гэтэл Н.Энхбаярыг энэ зүйл ангиар буруутгаж буй нь буруу гэдгийг өмгөөлөгч С.Нарангэрэл хэллээ. Түүнчлэн мөрдөн байцаалтын явцад зөвхөн нэг талыг барьсан, эрүү шүүлт ашиглаж, хүнлэг бус байдал гаргасныг ч тэрээр дурдсан юм.