Үл хөдлөх эд хөрөнгө зуучлалын байгууллагуудад Санхүүгийн зохицуулах хорооноос хяналт шалгалт хийх болжээ. Уг хяналт шалгалтаар хөрөнгө худалдах, худалдан авах үйл ажиллагаандаа байгууллагууд НҮБ-ын Аюулгүйн Зөвлөлийн тогтоол, шийдвэр, Мөнгө угаахтай тэмцэх олон улсын байгууллага /ФАТФ, Financial Action Task Force, FATF/-ын зөвлөмж болон Монгол Улсын хууль, эрх бүхий байгууллагаас баталсан дүрэм, журмын шаардлагуудыг хэрхэн хангаж байгаад үнэлгээ, дүгнэлт өгөх аж.

Учир нь манай улс ФАТФ-ын 2017 онд хийсэн хяналт шалгалт, үнэлэлт дүгнэлтээр “эрчимтэй хяналт”-д орсон билээ.

Ингээд  тус байгууллагаас өгсөн зөвлөмжийн дагуу УИХ-аас Мөнгө угаах болон терроризмыг санхүүжүүлэхтэй тэмцэх  тухай хууль болон холбогдох бусад хууль тогтоомжид нэмэлт өөрчлөлт оруулсан юм. Эдгээр нэмэлт, өөрчлөлтөөр зарим хяналтгүй байсан салбарт хяналт, зохицуулалт хийхээр хуульчилсан. Үүнд  үл хөдлөх эд хөрөнгө зуучлалын байгууллагууд багтсан бөгөөд Санхүүгийн зохицуулах хороо хяналт тавих үүрэг хүлээсэн байна.

Уг  шалгалтаар үл хөдлөх хөрөнгийн зуучлалын байгууллагуудын харилцагчдын мэдээллийг нягтлах, Мөнгө угаах болон терроризмыг санхүүжүүлэхтэй тэмцэх тухай хуулийн шаардлагыг хэрэгжүүлж буй байдлын түвшинг тогтоож, эрсдэлийг үнэлэх аж. Энэхүү хяналт шалгалт нь тухайн байгууллагыг Монгол Улcын эрүүгийн гэмт хэрэгт холбогдоогүйг баталгаажуулах, цаашлаад бохир мөнгө эргэлдүүлэх эрсдэлээс хамгаалах чухал алхам болно хэмээн үзэж байна.