Нийслэлийн шүүх өнөөдөр Д.Энхмандахад холбогдох хэргийг хэлэлцээд анхан шатны шүүх түүнийг цагаатгасан нь үндэслэлтэй байна гэж үзлээ. Д.Энхмандахыг “Эрдэнэ суварга” компанийн нягтлан бодогчоор ажиллаж байхдаа захирал Б.Сувдаагийн гарын үсгийг дуурайлган зурж, ХААН банкнаас 30 сая төгрөг залилсан, 15 сая төгрөгийн үнэтэй машиныг нь зарж, завшсан хэрэгт буруутгаж байлаа. Энэ хэрэгт түүнийг ямар ч холбоогүй гэдгийг хоёр шатны шүүх баталлаа. Цаашид тэрээр хилс хэрэг тулгаж, олон жил хууль хяналтын байгууллагын үүд сахиулж сэтгэл санаа, эрүүл мэндээр хохироосон, нэр төрд халдсан хэмээн “Эрдэнэ суварга” компанийг үүсгэн байгуулагч, НИТХ-ын төлөөлөгч асан Д.Бат-Эрдэнэ, түүний эхнэр Б.Сувдаа нарын эсрэг нэхэмжлэл гаргах бололтой.