Сүхбаатар дүүргийн шүүх өнөөдөр 10:00 цагаас МАХН-ын дарга, Ерөнхийлөгч асан Н.Энхбаяр, Нийслэлийн өмчийн харилцааны газрын орлогч дарга асан Д.Дуламсүрэн, “Улаанбаатар таймс” сонины ерөнхий эрхлэгч асан До.Чулуунбаатар, “Helon Company Ltd”, “Great global international” компанийн захирал Ж.Мягмаржаргал нарт холбогдох хэргийг хэлэлцэж эхэллээ.



Улсын яллагч Е.Сагсай Н.Энхбаяр, До.Чулуунбаатар нарыг Эрүүгийн хуулийн бусдын эд хөрөнгийг завшиж, үрэгдүүлсэн /150.3/, Д.Дуламсүрэнг албан тушаалаа урвуулан ашиглаж, бусдын эд хөрөнгийг завшиж, үрэгдүүлсэн /150.3, 163.2/,  Ж.Мягмаржаргалыг бусдын эд хөрөнгийг завшиж, үрэгдүүлсэн, мөрийтэй тоглосон /150.3, 243.2/ гэж буруутгаж байгаа.

Тэдний холбогдсон хэргийн тухай товчхон дурдахад, Н.Энхбаяр, До.Чулуунбаатар, Д.Дуламсүрэн нар “Өргөө” зочид буудал, “Улаанбаатар таймс” сонин, “Сүхбаатар” хэвлэх үйлдвэрийг хууль бусаар хувьчлахад оролцсон хэрэгт унаад буй. Харин Ж.Мягмаржаргалын хувьд Н.Энхбаярыг Ерөнхийлөгч байхад “Эрдэнэт” үйлдвэртэй ган бөмбөлөг нийлүүлэх гэрээгээ биелүүлээгүй байж, дахин гэрээ байгуулж 3.3 мянга гаруй ам.доллар үйлдвэрээс завшсан хэрэгт унаад байгаа юм.
Тус дүүргийн шүүх энэ хэргийг шийдвэрлэхээр зургаа дахиа товлочихоод байна. Өмнө нь товлосон шүүх хурал шүүгдэгч Н.Энхбаярын өмгөөлөгчдөөс болж хойшилсон юм.