Рок урсгал сонирхогчдын цуваа наймдугаар сарын 4, 5-нд Гачууртын “Монгол шилтгээн” тийш чиглэх нь. Тоглолтыг зохион байгуулагчид бэлтгэл ажлаа хангаж эхэлжээ. “Play time”-д жил бүр гадаадын нэг хамтлагийг урьж, оролцуулдаг жишигтэй. Тиймээс энэ удаад Японы “Shoegazing” урсгалаар тоглодог “Taffy” хамтлагийг урьсан гэнэ. Энэ хамтлаг сүүлийн үед хүчээ авч буй чадварлаг уран бүтээлчдээс бүрджээ. Харин наадамд оролцох Монголын хамтлаг, дуучид  долдугаар сарын 25-ныг хүртэл бүртгүүлэх боломжтой. Одоогоор 50 орчим хамтлаг наадамд оролцож, өөрсдийн тоглолтоо сонирхуулахаар бүртгүүлээд байгаа аж.
Дээрх тоглолтын үеэр “Playtime” зах ч уламжлал ёсоор ажиллах юм байна. Амьд хөгжим сонирхогч залуус уг захаар үйлчлүүлж биедээ шивээс хийлгэх, ховор цомог, хувцас, хэрэглэл худалдаж авах боломжтой. Энэ жил “Playtime” захад наадмын лого ашиглан өөрсдийн үйл ажиллагаагаа явуулах сонирхолтой хүмүүсийг “Hi-Fi” рекордст бүртгэж байна.