АНУ-ын Калифорни мужийн харьяат 32 настай Сы Цэнь гэдэг бүсгүй америкийн сансрын технологийг хулгайлан Хятад улс руу хууль бусаар дамжуулсных нь  төлөө  баривчиллаа хэмээн америкийн Хуульзүйн яамны тараасан мэдээлэлд дурджээ.

Хятад гаралтай энэ бүсгүй калифорнийн Помонд оршин сууж байхдаа мөн мөнгө угаасан, хуйвалдаан зохион байгуулж, худал гэрчилсэн зэрэг хэрэгт буруутган мягмар гарагт саатуулан барьжээ.

Бүсгүй 2013 оны гуравдугаар сараас  2015 оны арванхоёрдугаар сарын хооронд хуурамч бичиг баримт ашиглан Хятад улс руу тоног төхөөрөмж, ялангуяа америкийн сансар судлал, батлан хамгаалах салбарт ашигладаг тоног төхөөрөмж илгээж байсныг нь мөрдөн шалгах үеэр  олж тогтоосон  байна.

Энэ хууль бус ажиллагааныхаа төлөө Сы Чэнь байнга хөлс мөнгө авч, түүнийгээ Хятад дахь гэр бүлийнхээ нэгний дансанд хийж байсан гэнэ.

“Манай улсын үндэсний аюулгүй байдалд хохирол учруулахуйц бараа бүтээгдхүүнийг гадаадад гаргах боломж олгож, дамжуулж өгч байсан хүмүүсийг олж илрүүлэн хариуцлага тооцох болно” гэж  Калифорнийн Төвийн тойргийн холбооны прокурорын үүрэг гүйцэтгэгч Сандра Браун хэлжээ.

Сы Чэнь үнэхээр буруутай нь нотлогдвол түүнд 150 жилийн хорих ял оноох юм байна.