БНАСАУ өнгөрсөн ням гарагт дунд тусгалын “Пуккыксон-2” баллистик пуужин харваж амжилттай туршлаа гэж Умард Солонгосын удирдагч Ким Чен Ун мэдэгдсэнийг хэвлэлүүд мэдээллээ. Удирдагч бас ийм пуужингаар армийг ойрын үед хангахыг тушаасан гэнэ.

Японы NHK агентлаг Солонгосын мэдээллийн агентлаг ЦТАК-аас иш татан мэдээлснээр бол энэ удаагийн туршилт нь пуужинг зэвсэглэлд шилжүүлэхийн өмнөх хамгийн сүүлийн туршилт байсан гэжээ.

БНАСАУ-ын удирдагч пуужин харвах ажиллагааг өөрөө биечлэн удирдаж 100 оноогоор дүгнэхдээ 100 оноо өгөөд “Пуужинг аль болох ойрын хугацаанд олноор нь үйлдвэрлэж армид нийлүүлэн хангах хэрэгтэй” гэсэн  байна.
Ням гарагт БНАСАУ-ын харвасан пуужин нь 500 км нисээд далайд унасан юм.