АНУ-ын ерөнхийлөгч Дональд Трамп CBS телевизэд өгсөн ярилцлагадаа Умард Солонгосын удирдагч Ким Чен Уныг ухаантай залуу хэмээн нэрлэсэн байна.

Америкийн ерөнхийлөгчийнхөөр бол БНАСАУ-ын удирдагч хэдийгээр залуу хүн болов ч өөрийн улс орноо засаглан удирдаж чадаж байгаа гэнэ.

“Олон хүн энэ засаглалыг нь өөрчилж түүний авгаар юм уу, өөр нэгнээр солихыг бодож  байгаа гэдэгт би итгэлтэй байна. Харин тэр үүнийг барьж чадаж байна. Хэлэх юмгүй тэр бол ухаантай залуу” гэж Трамп тэмдэглэжээ.

Трамп Умард Солонгосын удаа дараа пуужин харваж байгаа тухайд “Би энэ талаар яримааргүй байна. Магадгүй тэд тийм ч сайн пуужинтай болж чадаагүй байж мэднэ. Гэхдээ л эцсийн эцэст тэд сайн пуужинтай болчихно шүү дээ” гэжээ.

БНАСАУ-ын асуудлыг шийдвэрлэхэд Хятадын үүрэг чухал гээд “Тэд Умард Солонгосыг сул дорой байхыг хүсэхгүй байгаа. Гэхдээ тэднийг цөмийн зэвсэгтэй болоосой гэж хүсэхгүй байгаа” гэжээ.