Б.СЭВЖИДМАА
“Уолт Дисней” компани АНУ-Хятадын хооронд худалдааны дайн хийхийн эсрэг байгаагаа мэдэгдлээ. Ерөнхийлөгч Трампын бодлого АНУ-Хятадын хооронд худалдааны дайн үүсгэж магадгүй гэж таамаглаж буй энэ үед хэрэв тийм зүйл болвол “Уолт Дисней” төдийгүй бизнесийн бүх байгууллагад хохирол учирна гэж анхааруулжээ.
Сүүлийн үед орлого ашиг нь буурч буй тус компанийн гол ололт амжилт нь Шанхай дахь “Дисней” парк болоод буй. Өнгөрсөн зургадугаар сард нээгдсэнээс хойш Шанхайн Диснейлэндээр долоон сая хүн үйлчлүүлсэн байна. Энэ жилийн Цагаан сараар гэхэд 10 хоногийн өмнө бүх тасалбар нь дууссан байжээ. Тиймээс гол орлого ашгийг нь төвлөрүүлж буй Хятад дахь бизнес нь хоёр улсын харилцаанаас болж доголдохыг “Дисней” хүсэхгүй байгаа юм. Тиймээс Ерөнхийлөгч Трампыг олон улсын худалдаа, цагаачлалд нээлттэй хандахыг уриалж, хилээ хааж болохгүй гэж сануулж байна.
Диснейн өнгөрсөн оны сүүлчийн улирлын орлого унаж, 14,8 тэрбум ам.долларт хүрсэн мэдээ бий. Энэ нь өмнөх оны мөн үетэй харьцуулвал гурван хувиар буурсан дүн ажээ.
