Хятадын Ардын чөлөөлөх армийн өндөр албаны 50 гаруй түшмэл ойрын үед албан тушаалаа өгөх гэж байна хэмээн Батлан хамгаалахын эх сурвалжаас авснаа South China Morning Post хэвлэл нийтэлсэн байна.

Энэ хүмүүсийн дотор 18 генерал байгаа гээд энэ албан тушаалтнууд ирэх намар Бээжинд болох ХКН-ын XIX  их хурлын дараа халагдацгаах юм гэжээ.
Энэ нь хятадын армийн боловсон хүчнийг шинэчилж, авьяас чадвартай  шинэ залуу офицеруудад ахмад үеийнхэн халаагаа өгөн зам тавьж өгөх нь зүйтэй гэсэн  төр засгийн бодлогын хүрээнд хийх , өөрчлөлт гэнэ. Үүний дагуу л  өндөр албан тушаалын энэ хүмүүс залуучуудад зайгаа тавьж өгөн тэтгэвэртээ гарах гэж байгаа юм байна.

Сонин бас Гонконгийн шинжээч Лян Голян энэ тухайд БНХАУ-ын дарга Си Зиньпиний шинэчлэлийн хүрээнд Хятадын Ардын чөлөөлөх арми цэргийн бүрэлдхүүнийхээ тоог цөөлж харин түүний мэргэжлийн ур чадварыг дээшлүүлэхэд анхаарч байгаагийн нэг илрэл гэснийг нийтэлжээ.

Өнөөдөр Хятад зэвсэгт хүчнээ шинэчлэх ажлыг идэвхтэй хийж БНХАУ-ын дарга Си Зиньпин технологийн дэвшил, инноваци нэвтрүүлэх нь “арми, үндэсний батлан хамгаалах хүчнийг төгөлдөршүүлэх гол хүчин зүйл” гэж мэдэгдсэн юм. Түүнийхээр бол 2016-2020 онд хэрэгжих 13 дугаар таван жилийн төлөвлөгөө нь Үндэсний батлан хамгаалах хүчин, зэвсэгт хүчний хөгжлийн шинэ үе байх юм байна. Си Зиньпин өмнө нь 2017 оны эцэс гэхэд Зэвсэгт хүчнийхээ бүрэлдхүүнийг 300 мянган хүнээр хорогдуулна гэж мэдэгдэж байсан юм.