Японы автомашин үйлдвэрлэлийн Honda концерн АНУ-ын зах зээлээс өөрийн үйлдвэрийн Honda,  Acura  маркийн 772 мянган машинаа эргүүлэн татаж авахаар боллоо гэж Associated Press агентлаг мэдээллээ. Ингэх болсон гол шалтгаан нь Takata фирмийн үйлдвэрлэж нийлүүлсэн аюулгүйн дэр нь шаардлага хангахгүй байсан явдал гэнэ.

Энэ хүрээнд тус концерн 2008-2012  оны Honda Accord, 2006-2011 онд үйлдвэрлэсэн Honda Civic, 2007-2012 оны Honda Fit,  2010-2012 оны Honda Insight машинуудыг эргүүлэн татах юм байна.

Takata фирмийн үйлдвэрлэдэг аюулгүйн дэр нь үүний өмнө 2014 онд бас дуулиан тарьж байсан удаатай. Ослын үед пэр нь зөв гарч ирэхгүй, гарч ирэхдээ металлын хэлтэрхий цацаж байснаас 11 хүн амь алдсаны 10 нь АНУ-д нас барсан юм. Үүнээс болж эргүүлэн татсан машины тоо дэлхийн хэмжээгээр 100 саяыг давсан байна.