Өнгөрсөн оны сүүлчээр оросын Сочи хотын орчим сүйрсэн ОХУ-ын Батлан хамгаалах яамны Ту-154  нисэх онгоцны хар хайрцагны бичлэгийг тайлж уншсан мэргэжилтнүүд онгоцны ослын шалтгаан нь ямар ч халдлага биш гэж тогтоожээ. Энэ дүнгээ мэргэжилтнүүд энэ 8-ны ням гарагт танилцуулсан байна.

Хар хайрцагны бичлэгээр бол онгоцны осол нь техникийн гэмтэл, эвдрэлээс  болсон гэж гарсан байна. Ту-154 онгоц техникийн шалтгаанаас гадна нислэгийн үед багийн гишүүд алдаа гаргасан гэсэн хувилбар ч байна. Эрэл хайгуулын ажиллагааны үед онгоцны гурван ч хар хайрцгийг уснаас гаргаж авсан ч мэргэжилтнүүд нэгийг нь л  тайлж уншжээ.

Батлагдаагүй мэдээллээр бол онгоцны багийнхан эргээс зургаан км явж байхдаа  нислэгийн зурвас руу эргэж буух гэж оролдоод, харамсалтай нь хэдхэн секундын дараа тогтворжуулагч нь хугарч дугуй, хөдөлгүүрт нь орж турбиныг нь гэмтээснээр унасан байна. 

Өнөө хүртэл оросын зарим хэвлэл, Хар далай дээгүүр нисч таарсан европын Sentinel -1B хиймэл дагуулын мэдээг үндэслэлээ хэмээн Сири лүү нисч явсан оросын онгоц халдлагын улмаас сүйрсэн гэж мэдээлж байсан юм.