Жил бүрийн 12 дугаар сарын 01-ний өдөр “ДОХ-той тэмцэх дэлхийн өдөр” тохиодог. Манай улс энэ жил “Хүний дархлал хомсдлын вирүс, Дархлалын олдмол хомсдлоос сэргийлэх нь та бидний гарт” уриан дор тэмдэглэн өнгөрүүлэх юм. Энэ өдрийг угтаж, нийслэлийн Налайх дүүргийн Засаг даргын Тамгын газраас дүүргийн төв гудамж, талбайгаар улаан тууз аялуулах арга хэмжээг зохион байгуулжээ.

ДОХ-ын эсрэг эв санааны нэгдэл, итгэл найдварын бэлгэ тэмдэг болсон улаан тууз аялуулах ажиллагаанд дүүргийн Засаг даргын орлогч С.Тунгалаг, Нийгмийн хөгжлийн хэлтсийн дарга М.Баттулга, Эрүүл мэндийн нэгдлийн Нийгмийн эрүүл мэнд, тусламж үйлчилгээ хариуцсан орлогч дарга Ц.Алтантуяа нараас гадна тус дүүрэгт үйл ажиллагаа явуулдаг төрийн болон хувийн хэвшлийн байгууллагын албан хаагч, “Голомт” цогцолбор сургуулийн сурагчид оролцлоо.

Манай улсад өнөөдрийн байдлаар ХДХВ/ДОХ-ын нийт 219 тохиолдол бүртгэгдсэн байна. Үүний 62 хувийг 25-34 насны залуучууд эзэлж байгаа бол 80 хувийг эрэгтэйчүүд эзэлдэг судалгаа гарчээ гэж нийслэлийн Налайх дүүргийн ЗДТГ-аас мэдээллээ.