Засгийн газар, МҮЭХ болон Монголын ажил олгогч эздийн нэгдсэн холбоо (МАОЭНХ)-ны “Хөдөлмөр, нийгмийн зөвшлийн гурван талт хэлэлцээр” ирэх сарын 05-нд болно.

Өнгөрсөн оны гурван талт хэлэлцээрээр цалин, тэтгэвэр тэтгэмжийг нэмэхэд 90 тэрбум төгрөг зарцуулахаар тохирсон ч эдийн засаг хүндрэлтэй гэсэн шалтгаанаар Засгийн газар хүлээсэн үүргээ биелүүлээгүй. Мөн 2017 оны төсөвт цалин, тэтгэвэр тэтгэмжийг нэмэх хөрөнгө суулгаагүй юм. Харин 2016-2020 оны Засгийн газрын үйл ажиллагааны хөтөлбөрт эдийн засгийн боломжтой болсон үед цалин, тэтгэвэр тэтгэмжийг нэмэгдүүлэхээр тусгасан байна.

Ирэх сарын 05-нд болох хэлэлцээрээр МҮЭХ ямар шаардлага хүргүүлэх талаар тус холбооны Ерөнхийлөгч Х.Амгаланбаатараас тодруулахад “Цалин, тэтгэвэр, тэтгэмжийг нэмэх боломжгүй учраас бид нэн тэргүүнд одоо байгаа ажлын байрыг хамгаалахад анхаарна. Мөн одоо авч байгаа цалингийн түвшин болон бодит худалдан авах чадварыг хамгаална. Үүний тулд Засгийн газар, МАОЭНХ-той хамтран “Үнэ бүрдэлтийн тухай хууль” боловсруулахаар ажиллаж байна. МҮЭХ асуудлыг шийдвэрлүүлэхээр жагсдаг биш, гарц гаргалгааг нь ярилцдаг, Засгийн газар түүнийг нь сонсож, бодлого шийдвэртэй тусгаж ажилладаг байх хэрэгтэй. Ингэж байж бид Эдийн засгийн хүндрэлийг хохирол багатай даван туулна” хэмээв.