Дэлхийн улс орнуудын зээлжих зэрэглэлийг тогтоодог “Moody’s” агентлаг Монгол Улс болон Хөгжлийн банкны зээлжих зэрэглэлийг бууруулсныхаа дараа арилжааны банкуудын талаарх үнэлгээгээ шинэчилсэн талаарх мэдээллийг өөрсдийн цахим хуудаст мэдээлжээ.

Энэ агентлаг Монгол Улсын арилжааны долоон банкны төгрөгийн хадгаламжийн урт хугацааны зэрэглэлийг B3-аас CAA1 болгож, банкны гадаад валютын хадгаламж CAA1 зэрэглэлтэй байсныг мөн нэг шат бууруулж, CAA2 болгоод байгаа юм.
Банкуудын зэрэглэл өндөр байсан ч улсын болон Хөгжлийн банкны зээлжих зэрэглэл буурсан тул арилжааны банкны зэрэглэл ч буурч байгаа юм. Өөрөөр хэлбэл, улсын зээлжих зэрэглэлээс дээгүүр үнэлгээтэй арилжааны банк эдийн засгийн утгаараа байх боломжгүй гэж үзсэн юм. Мөн банкны салбар макро эдийн засгаас өндөр хамааралтай байгаатай холбоотой гэж тайлбарлаж байна. Цаашдаа банкуудын активын чанар муудаж, ашигт ажиллагаа буураагүй нөхцөлд зээлжих зэрэглэлийг богино хугацаанд эргээд өсгөх боломжтой гэж “Moody’s” үзэж байгаа юм байна.