Цаг уур, орчны шинжилгээний газраас цаашид ихэнх нутгаар цас орж, цасан шуурга шуурч, манай оронд өмнө тохиолдож байгаагүй хүйтэн өвөл болох талаар мэдээлж буй. Энэ нь мал аж ахуйн өвөлжилт, хаваржилтанд хүндрэл учруулж болзошгүй нөхцөл байдал үүсээд байгаа юм.

Одоогоор нийт нутгийн 50 хувьд цасан бүрхүүл тогтож, улмаар хүйтний эрч эрс чангарч, Сэлэнгийн ихэнх, Завханы хойд, Хөвсгөлийн баруун, Булганы зүүн өмнөд хэсэг, Увс, мөн Дорнод, Хэнтий, Төв,  Дархан-Уул аймгууд зуд болох хамгийн их эрсдэлтэй байгаа бол Сүхбаатарын зарим нутаг, Баян-Өлгий, Ховд, Өвөрхангай, Дундговь, Дорноговь аймагт  их эрсдэлтэй байдалд орсон нь нийт аймгуудын 70 гаруй хувийг эзлэж байна.

Иймээс ХХААХҮЯ-наас “Малчдад туслах сайн санааны аян”-ыг санаачлан өрнүүлж, ард иргэд, албан байгууллага, аж ахуйн нэгж болон  гадаад орны Элчин сайдын яамд, хандивлагч орон, олон улсын байгууллагуудад хандан малчдад хандив, тусламж үзүүлэхийг уриаллаа.