Америкийн Бүгд найрамдах намаас нэр дэвшигч Дональд Трамп Ерөнхийлөгчийн сонгуульд ялсны дараагаар Ардчилсан намынхан дийлэнх олонх болдог Калифорни мужийг тусгаар улс болгох хөдөлгөөн маш эрчимтэй өрнөж эхэлжээ. Ардчилсан намаас нэр дэвшигч Барак Обамаг Ерөнхийлөгчөөр сонгогдоход Бүгд найрамдах намынхан үнэмлэхүй олонх болдог Техас муж Америкаас салан тусгаарлах тухай яриа гарч, дэлхийн нийтийн анхаарлыг татаж байсан. Иймд энэ мэт мэдээнд гайхах зүйлгүй мэт. Гэвч Калифорни мужийг тусгаар улс болгохын төлөөх "Yes California" хөдөлгөөнийхөн ОХУ-ын нутаг дэвсгэр дээр өөрийн гэсэн төлөөлөгчийн газраа нээхээр төлөвлөж байгаа тухай “Business Insider” сэтгүүлийн мэдээ олныг анхаарлыг ихэд татав.
 
Тус хөдөлгөөний удирдагч Луис Маринелли нь төлөөлөгчийн газар дипломат үүрэг гүйцэтгэхгүй, зөвхөн тус мужийн түүх, соёлын тухай оросуудад танилцуулан, арилжаа наймаа ба аялал жуучлалыг өргөтгөхөд дэм үзүүлэх зорилготой гэсэн тайлбар өгсөн. Иймэрхүү төлөөлөгчийн газрыг зөвхөн Орос гэлтгүйгээр бусад олон оронд нээх төлөвлөгөөтэй гэдгээ Маринелли хэлсэн байна. Ийм замаар өөрийн мужийг улсын зэрэгтэй түүх, соёл, өвөрмөц онцлогтой гэдгийг дэлхий дахинаа таниулж чадвал яваандаа тусгаар улс болоход тун таатай боломж бүрдэх ёстой гэнэ.
 
Тэрээр “Шаардлагатай мөч ирэхэд калифорничууд дэлхийн улс орнуудад хандан дэмжлэг хүсч “Та нар биднийг АНУ-аас үл хамаарах тусгаар улс гэдгийг хүлээн зөвшөөрч байна уу?” гэж асууна” гэжээ. Калифорни нь нутаг дэвсгэрийн хэмжээгээр АНУ-даа гуравдугаарт, ДНБ-ий хэмжээгээр нэгдүгээрт ордог муж улс. Арваннэгдүгээр сарын 8-нд болсон Ерөнхийлөгчийн сонгуулийн үеэр калифорничуудын дийлэнх нь Ардчилсан намаас нэр дэвшсэн Хиллари Клинтоны төлөө саналаа өгсөн байна.