Нийслэлийн шүүх УИХ-ын гишүүн Х.Баттулга, ХЗДХ- ийн сайд Ц.Нямдорж нарын маргааны асуудлаар өнгөрсөн баасан гаригт хуралдаж анхан шатны шүүхийн шийдвэрийг хэвээр үлдээв. Тодруулбал, ХЗДХ-ийн сайд Ц.Нямдорж УИХ-ын гишүүн Х.Баттулгыг гүтгэж нэр төрд нь халдсан байна гэж үзжээ.
Ц.Нямдорж нь энэ оны гуравдугаар сарын 21-ний өдрийн хэвлэлийн бага хурал, "Сайд ба сэтгүүлч" телевизийн ярилцлагад орохдоо Зам, тээвэр, барилга, хот байгуулалтын сайд асан, УИХ-ын гишүүн Х.Баттулга нь олон тэрбум ам.долларын өртөгтэй төмөр зам барих гэрээг нууцаар байгуулсан хэмээн мэдэгдсэн юм. Харин үүнийг Х.Баттулга үгүйсгэж нэр төрөө сэргээлгэхээр шүүхэд хандсан. Энэ дагуу Хан-Уул дүүргийн шүүх хуралдаад Х.Баттулгын нэр төрийг сэргээсэн шийдвэр гаргаж, Ц.Нямдоржийг хэвлэл мэдээллийн хэрэгслээр хуурамч мэдээлэл цацсан шигээ уучлал гуйхыг шаардсан юм. Гэвч сайд Ц.Нямдорж нь Хан-Уул дүүргийн шүүхийн шийдвэрийг эсэргүүцэн Нийслэлийн шүүхэд гомдол гаргасан ч анхан шатны шүүхийн шийдвэр хэвээр үлдлээ.
Д.Мөнх