“Манай улсад сүүлийн 10 гаруй жилд ажиглагдаагүй онцгой хүйтэн энэ сарын дундуур болох төлөвтэй байна” гэх Цаг уур, орчны шинжилгээний газрын мэдээллийг Онцгой байдлын Ерөнхий газар иш татан мэдээллээ.
Мөн Онцгой байдлын газраас өнөөдөр баруун аймгуудын нутгаар, маргааш, нөгөөдөр ихэнх нутгаар салхи секундэд 18-20 метр, зарим үед 24 метр хүрч, цасан болон шороон шуурга шуурч, зам даваа хаагдах нөхцөл байдал үүсч болзошгүй байгааг иргэдэд онцгой анхаарууллаа. Манай оронд сүүлийн 10 жил үзэгдээгүй энэ хүйтрэлт 17-25-ныг дуустал үргэлжлэх урьдчилсан мэдээлэл байгаа бөгөөд 17-ны өдрөөс эхлэн хүйтний эрч эрс чангарч нуур, голын хөндий, хотгоруудаар шөнөдөө 42-47 хэм хүрч хүйтрэх юм байна.

Харин 17-ны өдрөөс Улаанбаатар хотод өдөртөө 15 хэм хүртэл хүйтэрч, амралтын өдрүүдэд өдөртөө 22, шөндөө 26 хэм хүрч хүйтрэх тав хоногийн урьдчилсан төлөв гарчээ.

Одоогийн байдлаар манай орны нийт нутаг дэвсгэрийн 50 орчим хувь нь цасан бүрхүүлтэй байгаагаас зарим аймаг 11-20 см, 21-40 см зузаан цастай, нийт нутгийн 30 хувьд өвөлжилт хүндэрч болзошгүй байна.

Энэ хүйтэн, хур тундасыг дагаад орон нутагт зорчиход хүндрэл гардаг тул цасанд боогдох магадлалтай хэсгүүдийн судалгааг гаргаж, Ховд-Булган улсын хил чиглэл, Ховд-Алтай чиглэлийн замд цасанд боогддог хэсгүүдэд хамгаалах далан хийжээ. Мөн орон нутгийн нийтийн тээвэрт үйлчилдэг 418 тээврийг хэрэгслийн өвлийн бэлтгэлийг хангуулж, нөөцийг (шатахуун, хөлдөггүй шингэн, спирт, сэлбэг хэрэгсэл гэх мэт) бэлтгэсэн байна.