ШУА-ийн Хими, химийн технологийн хүрээлэнгээс жил бүр уламжлал болгон зохион байгуулдаг “Chemistry-2016” эрдэм шинжилгээний бага хурал өнөөдөр  Хими, химийн технологийн хүрээлэнд болно. Энэ удаагийн хурлыг Шинжлэх ухааны гавьяат зүтгэлтэн, профессор, академич Ж.Амгалангийн нэрэмжит болгон зохион байгуулж буйгаараа онцлог аж. Хуралд манай улсын тэргүүлэх химичдээс гадна олон улсын эрдэмтэн судлаачид оролцох юм байна.

Хурлаар хими, химийн технологийн чиглэлийн маш олон судалгааны үр дүнгүүдийг танилцуулах нь. Тухайлбал “Хөвсгөлийн фосфоритын голлох ордуудын ураны агуулга, бүтцийн судалгаа”, “Шинэ материал газрын ховор элементүүд ба эмт эрдсийн судалгаа, био-нано бүтээгдэхүүн”, “Газрын тосоор бохирдсон хөрсний бохирдлыг бууруулах судалгаа”, “Улаанбаатар хотын өнгөн хөрсөн дэх хүнд элементүүдийн тархалт, эх үүсвэр, геохимийн төлөв байдал”, “Дорнодын Хөөтийн ордын нүүрсний халуун задралын судалгаа” зэрэг олон сонирхолтой судалгааны үр дүнг мэдэж авч болох нь.