Латвийн  хилчдийн барьж байгаа зөвлөлтийн үеийн автоматыг НАТО-гийн стандартад нийцсэн зэвсгээр солих ажлыг жил хагасын хугацаанд хийж дуусгана гэж Улсын хил хамгаалах байгууллагын тэргүүн Нормунд Гарбарс мэдээллийн BNS агентлагт мэдэгджээ.

“Үүнийг хэрхэн хийх нарийн хөтөлбөр бий, тэгээд ч ажил хэдийнээ эхэлсэн” гэж тэр тэмдэглэсэн байна.
2018 онд тохиох Латвийн тусгаар тогтнолын баяраар манай хилчид зөвлөлтийн үеийн зэвсэггүй жагсах болно гэж Гарбарс онцлоод зэвсэг солих ажлыг Зэвсэгт хүчний командлалтай хамтан хийж командлагч Раймонд Граубегаар толгойлуулсан ажлын хэсэг байгуулсан гэлээ.
Калашниковын автоматаас гадна мөн л оросын Макаровын гар бууг ч гэсэн сольж огт өөр загварын зэвсэг барих гэнэ.

Үүний өмнө тавдугаар сард Латвийн цагдаагийнхан ч зөвлөлтийн үеийн зэвсгийг халж НАТО-гийн жишиг, стандартад нийцсэн зэвсэглэлд шилжихээ мэдэгдсэн юм. Зөвхөн цагдаагийнхан нь  зэвсгээ солиход 4,9 сая евро шаардлагатай гэж Латвийн Дотоод хэргийн яамны тайланд бичсэн байна. Үүний 3,98 сая еврогоор Glock маркийн гар буу авах бол 904.9 мянган еврогоор эвхдэг мөрлөгчтэй МР5 пулемёт-гар буу авах юм байна.