Ерөнхийлөгчийн зарлигаар шинэ парламентын нээлт маргааш болох ёстой ч хуучин парламент хөшгөө хаах боломжгүй болжээ. Учир нь, МАН-ын бүлэг хаалтын хуралдаанд оролцох боломжгүй гэдгээ мэдэгдлээ. Бүлгийн дарга Ө.Энхтүвшингийн мэдээлж буйгаар СЕХ өчигдөр оройныхоо хуралдаанаар УИХ-ын гишүүний түр үнэмлэхээ гардаж аваад байсан таван хүнийг эргүүлэн татсан нь тус бүлгийнхнийг чуулганы хуралдаанд оролцуулах боломжгүй болжээ. Шинэ парламентад МАН-аас 27 нэр дэвшигч ялалт байгуулаад байгаагаас Өвөрхангай аймагт ялалт байгуулсан Н.Төмөрхүү, С.Чинзориг, Орхон аймагт ялалт байгуулсан О.Содбилэг, Увс аймагт нэр дэвшсэн Ч.Хүрэлбаатар, Б.Чойжилсүрэн нарыг түр түдгэлзүүлээд байсан юм. Харин үүнээс гурвыг нь буюу О.Содбилэг, Б.Чойжилсүрэн, Ч.Хүрэлбаатар нарт шүүхийн шийдвэр гараагүй учир Ерөнхийлөгчид өргөн мэдүүлсэн. Харин Өвөрхангайд нэр дэвшсэн хоёрыг хууль зөрчсөн гэж Хан-Уул дүүргийн шүүгч шийдвэр гаргаад байна.
Харин үүнийг МАН-ын бүлгийн дарга Ө.Энхтүвшин, “Энэ бол шүүхийн шийдвэр бус нэг шүүгчийн л шийдвэр. Шүүхийн албан ёсны шийдвэр гараагүй байна. Давж заалдах шатны шүүхээс хоёр нэр дэвшигчийг хууль зөрчсөн гэж үзвэл хүлээн зөвшөөрнө. Энэ бол нэг талыг барьсан шийдвэр. СЕХ ч гэсэн манай намаас тавьсан асуудлыг шийдэхгүй байж АН-аас тавьсан асуудлыг шийдвэрлэж байгаа нь хараат бус шинж нь алдагдаж байна” гэв.

Бүлгийн дарга Ө.Энхтүвшингээс дараах асуултад хариу авлаа.

-Өвөрхангай аймагт нэр дэвшсэн хүмүүс илт хууль зөрчсөн байсан. Үүнийг намын бүлэг хамгаалж болж байгаа юм уу?
-Хууль зөрсөн гэдгийг зөвхөн нэг л шүүгч тогтоосон. Түүнээс энэ эцсийн шийдвэр биш. Нөгөө талаар СЕХ нэг талыг барьж байна шүү дээ.

-Өмнөх сонгуульд маргаантай нэр дэвшигчдийг шүүхийн шийдвэр гарсан хойно нь тангарагийг нь өргүүлээд явдаг байсан. Энэ удаад нэрийг нь өргөн барьсан нэр дэвшигчдийн тангарагийг нь өргүүлээд явж болохгүй юм уу?
-2004, 2008 оны сонгуульд тийм парактик гарч байсан. Гэхдээ тэр хүмүүст СЕХ гишүүний түр үнэмлэх гардуулаагүй байсан юм. Харин энэ удаад СЕХ тогтоолоо гаргаад түр үнэмлэхээ гардуулсан хойноо эргүүлэн татлаа. Энэ бол хууль зөрчсөн үйлдэл юм. Бид үүнийг хүлээн зөвшөөрөхгүй байна.
-Нэгэнт Ерөнхийлөгчийн зарлиг гарчихсан болохоор тангарагаа өргөвөл яах вэ?
-Боломжгүй л дээ. Нэр дэвшигчдийн 57 нь бүрдэж байж тангарагаа өргөнө гэж Үндсэн хуульд заасан байгаа. Хуулиа дагах ёстой.