Бүгд найрамдах Солонгос улсаас Монгол Улсад суугаа Онц бөгөөд бүрэн Эрхэт Элчин сайдын нэрэмжит уран зураг, гар урлалын уралдааныг Монголын хүүхдийн урлан бүтээх төв хамтран зохион байгуулахаар болжээ. Уралдааны сэдэв нь “Монгол-Солонгосын нөхөрлөл” бөгөөд Солонгос орны сайхан сэтгэлт ард түмэн, тэдний хүсэл, зоригийг өөрсдийн бүтээлдээ тусган илэрхийлэх, хоёр орны эртнээс улбаатай найрсаг харилцаа, эх түүх, соёл иргэншил, найрамдал, нөхөрлөл, олон талт хамтын ажиллагаанаас танин мэдэх, суралцан судлахад уралдааны зорилго оршиж буй аж. Ерөнхий боловсролын сургуулийн 1-12 дугаар ангийн сурагчид оролцох эрхтэй бөгөөд дүрслэх урлаг, уран зураг, гар урлал, арьсан урлал, баримал, сүрэл, сийлбэр зэрэг бүтээлээр өрсөлдөх боломжтой юм байна.

Уралдааны эцсийн шалгаруулалтыг ирэх сарын 23-нд хийж, байр эзэлсэн сурагчдад шагналыг нь гардуулах юм байна. Дашрамд сонирхуулахад, гран при шагналыг нь 200 мянган төгрөг дагалдах нь.