Япон тэнгис дэх оросын мэдлийн бүсэд орж ирсэн Умард солонгосын "Дае Янг 10" хөлгийг саатуулан шалгах үеэр багийнхан оросын хилчдэд эсэргүүцэл үзүүлэн халдсанаар нэг хилчин толгойдоо шархадсан байна. Үүний улмаас оросын хилчид аргагүйн эрхэнд галт зэвсэг хэрэглэхэд хүрчээ.

“Хөлгийг шалгах үед умард солонгосын хөлгийн багийнхан оросын Холбооны аюулгүйн албаны ажилтнууд руу халдаж амь насанд нь аюул учруулахад хүрсэн тул урьдчилан анхааруулахаар галт зэвсэг  хэрэглэхэд хүрлээ.  Энэ үеэр солонгосын хөлгийн багийн есөн хүн шархадсанаас нэг нь нас барлаа. Манай хилчдээс нэг хүн шархадсан” гэж албаны мэдээнд дурджээ. Хөлөгт умард солонгосын 48 хүн явсан байна.

Саатуулах үеэр эсэргүүцэл үзүүлсэн, мөн шархадсан загасчдыг ОХУ-ын Приморт хүргэсэн байна.