Голландад эдгэршгүй өвчтэй хүмүүс өөрийн хүсэлтээр хиймэл амьсгалын аппарат хэрэгслүүдээ салгуулахыг зөвшөөрсөн хууль үйлчлээд 14 жилд болж байна.

Харин одоо тус улсын эрх баригчид эрүүл хүмүүс бусдын тусламжтайгаар амьдралаас явахыг зөвшөөрсөн хууль гаргахаар төлөвлөж байна гэж  The Telegraph мэдээллээ. Хэвлэлийн бичсэнээр бол энэ хуулийг баталснаар цаашид амьдрах ямар ч сонирхолгүй болсон, гутрангуй хүмүүс хүсэлтээ гаргаж албан ёсоор амьдралаас явж болох юм байна.

Гэхдээ нэг хэсэг нь хууль боловсруулахад тухайн хүн үнэхээр амьдралаас уйдсан, үүндээ бат итгэлтэй байгаа учраас түүний амь насыг нь тасалж  болно гэдгийг үнэнээр нь хөдөлбөргүй нотлох шаардлагатай гэж үзэж байна.

Голланд сайн дураараа амьдралаас явахыг зөвшөөрсөн хууль баталсан анхны улс. 2002 онд баталсан хуулиар бол зөвхөн эдгэршгүй өвчтэй хүмүүс өвчнөө тэсвэрлэж чадахгүй болоод амьдрах ямар ч итгэлгүй болсон тохиолдолд эмнэлгийн аргаар амь насыг нь таслахыг зөвшөөрч байсан юм.
 
Харин одоо эрүүл хүмүүст  ийм зөвшөөрөл өгөх нь хүмүүсийг сайн дураараа амьдралаас явахыг нь зөвшөөрдөг голланд уламжлал бий болгож байна гэсэн шүүмжлэл дагуулж байна.