АНУ-ын ерөнхийлөгчийн сонгуульд нэр дэвшээд байгаа тэрбумтан Дональд Трампыг өөр нэр дэвшигчээр солих боломжийг  Бүгд найрамдах намынхан хэлэлцэж байгаа гэнэ.

Бүгд найрамдах намын Үндэсний хорооны хуульчид энэ тухай ярьж байгаа гэж  үйл явдалд хамгийн ойрын эх сурвалж мэдээлснийг Politico хэвлэл дамжуулжээ.
Хороо ойрын 48 цагийн дотор сонгуулийн өмнөх кампанит ажлынхаа тухай, старатеги зорилтоо авч хэлэлцэнэ. Сонгууль болохоос нэг сарын өмнө нэр дэвшигчээ солих боломжийн талаар ч судалж байгаа гэж  Намын Үндэсний хорооны дарга Рейнс Прибус   мэдэгдсэн байна.

Гэхдээ нэр дэвшигчээ сольсон ч гэсэн Үндэсний хороо Трамптай хамтран ажиллана. Яагаад гэвэл дүрмээр бол АНУ-ын ерөнхийлөгчийн сонгуульд нэр дэвшигчийг нас барсан юм уу, өөрөө татгалзсан тохиолдолд л сольдог юм байна.
Бүгд найрамдах намын удирдагч Мэтт Пиннел Үндэсний хороондоо “Бүр ядахад одоо л....” гэж хэлсэн гэж хэвлэл тэмдэглэж. Харин Үндэсний хорооны хэвлэлийн нарийн бичгийн дарга энэ мэдээллийг тайлбарласангүй.

Нэр дэвшигч Трампын 2005 онд телевизээр нөхөртэй эмэгтэйчүүдийн талаар гутаасан үг хэлснийг The Washington Post сонин өнгөрсөн бямба гарагт нийтэлсэн нь дуулиан болсны дараагаар тус намын хуульчид түүнийг солих тухай хэлэлцэж эхэлсэн юм байна.
“Би зүгээр л үнсч эхэлнэ. Хүлээх ч үгүй. Чи үнэхээр л од юм бол үүнийг хийхээс аргагүй. Чи бүхнийг хийж чадна” гэж хэлсэн нь дуулиан болоод байгаа юм. Трамп үүнийхээ төлөө сая уучлал гуйсан юм.