Б.БАДРАЛ

НҮБ-ын Ерөнхий нарийн бичгийн дарга Бан Ги Мун нь Афганистанд амиа алдсан энгийн иргэд ба дүрвэгсдийн тоо өмнө нь байгаагүй их хэмжээнд хүрсэнд сэтгэл зовниж буйгаа илэрхийлжээ. Тэрээр Брюссель хотноо болж байгаа Афганистаны асуудлаарх олон улсын хурал дээр үг хэлэхдээ “Афганистаны ард түмний амьдрах ёстой сайхан ирээдүйд хүрэх замд учирч байгаа гол саад нь зэвсэгт мөргөлдөөн. Амиа алдсан энгийн иргэд ба орон гэрээ орхихоос өөр аргагүй болж байгаа хүмүүсийн тоо өмнө нь байгаагүй их хэмжээнд хүрсэнд би гүнээ сэтгэл зовниж байна. Энэ жил Афганистаны дотоодод арга буюу шилжилт хөдөлгөөн хийгч ба гадаад руу дүрвэгч иргэдийн тоо нэг саяыг давж гарна” гэжээ.

Америк тэргүүтэй эвслийн хүчний дийлэнх нь Афганистаныг орхин гарсны дараагаар тус улс дахь байдал тун ээдрээтэй болсон. Афганистаны хөдөө орон нутагт ихээхэн хэмжээний газар нутаг эзлэн аваад байсан “Талибан” хөдөлгөөн сүүлийн саруудад том хотууд руу дайралтаа эхлүүлсэн нь байдлыг улам ноцтой болгож байна.