Зураг түүх өгүүлнэ гэдэг. Монголын тагнуулын байгууллагын 90 жилийн ойд зориулсан архивын материал, гэрэл зургийн үзэсгэлэн Занабазарын нэрэмжит дүрслэх урлагийн музейн үзэсгэлэнгийн танхим “улаан гэр” галерейд гарч байна.
Үзэсгэлэнд Богд хааны үеийн тагнуулын үйл ажиллагааны тухай баримтаас эхлээд монголын түүхэнд чухал үүрэг гүйцэтгэсэн тагнуулуудын фото зураг, урьд өмнө нь олон нийтэд дэлгэн үзүүлж байгаагүй баримтат кино гээд домог мэт ам дамжин яригдаж, заримыг нь ном зохиолоос л уншиж байсан сонирхолтой үзвэрүүдийг өөрийн биеэр үзэх таатай боломж олдож байна.
Тухайлбал, Р.Эндрюсийн буцааж авчирж өгнө гээд сураггүй болсон экспедицийн монголын талтай хийсэн гэрээ, Аж үйлдвэрийн дарга байсан Ө.Пунцагийн хилс хэргээр шоронд хоригдож байхдаа цамцан дээрээ өөрийн цусаар бичсэн бичиг, хэлмэгдэгсдэд үүсгэсэн оросуудын хавтаст хэргийн материал гэх зэрэг ховор сонин архивын баримтууд тайлбартайгаа тавигджээ. Тус үзэсгэлэн 9-нийг дуустал олонд нээлттэй байх ажээ.
