ОХУ жилийн өмнөөс Сирид алан хядагч “Лалын улс”-ын зэвсэгт бүлэглэлийн байрлал руу агаараас цохилт өгч эхэлсэн. Энд байлдаж байгаа оросын  “Вагнерын бүлэг”-т хоёр мянга гаруй цэрэг дайчин ажиллаж байгаа юм.

Одоогоор ОХУ энэ ажиллагаанд 10,3 тэрбум рубль зарцуулаад байгаа гэсэн мэдээлэл бий. “Вагнерын бүлэг” оросын Красндорын хязгаар дахь цэргийн Молькино баазад бэлтгэл хийж тийшээ явж байгаа юм байна. Энэ баазыг байгуулах тендерт ОХУ-ын ерөнхийлөгчийн ойрын хүрээллийн гэгддэг Петербургийн саятан Евгений Пригожин ялсан гэсэн мэдээлэл бий.

Хамгийн сонирхолтой нь Сирид оросын ажиллагааны үеэр цэргийн албан хаагчдын ямар хохирол үзсэнийг ихээхэн нууцалж байгаа гэнэ. ОХУ-ын Батлан хамгаалах яам тэнд оросын ердөө 27 цэрэг дайчин амь үрэгдсэн гэж баталдаг ч “Вагнерын бүлэг”-т байлдаж байсан нэг офицер лавтай 100 орчим хүн амь алдсан гэдэг.

Засгийн газар амь үрэгдсэн дайчны ар гэрт таван сая рублийн нөхөн олговор өгч байгаа юм. Харин тэнд байлдаж байгаа цэргийн албан хаагчдад сарын 300 орчим мянган рублийн цалин өгдөг байна.