ОХУ-ын Дотоод явдлын яамны авлигатай тэмцэх газрын даргын орлогч хурандаа Дмитрий Захарченког долоон сая рублийн авлига авсан хэрэгт сэжиглэн баривчилсан юм байна. Түүний хэргийг мөрдөх явцдаа нэгэн байрыг нь нэгжих үеэр найман тэрбум рубль хийсэн 50 том цүнх илэрчээ. Зарим хэвлэл үүнийг есөн тэрбум рубль байсан гэж бичиж байна.
 
Харин Дмитрий Захарченко энэ тухайд “мөнгө олдсон тэр байр бол  эгчийн минь байр, энэ явдалтай би ямар ч холбоогүй” гэж байгаа гэнэ.
“Интерфакс” агентлаг энэ тухайд Дотоод яамны эх сурвалж Дмитрий Захарченкогийн энэ мөнгө нь “Нота-банк”-ны активаас луйвардаж авсан мөнгөний нэг хэсэг гэж бичжээ. “Нота-банк”-наас 26 тэрбум рубль завшсан хэргийг мөрдөн шалгаж байгаа юм. Энэ хэргийг мөрдөх явцад саявтар  хууль сахиулагчид тус банкны хоёр удирдагч болох ах дүү Ерохиныг баривчилсан бол дараа нь санхүүгийн захирал Марчуковыг бас баривчилсан юм.

Мөрдөн шалгах явцад луйврын энэ хэрэгт хурандаа Дмитрий Захарченко нь оролцсон, Марчуковын сайн танил болох нь илэрсэн юм байна. Ийм ч болохоор Захарченко танилдаа түүнийг саатуулах гэж байгааг урьдчилан анхааруулж хадгалж байсан мөнгийг нь түр хугацаагаар авсан бололтой.