Үндэсний дуу бүжгийн эрдмийн чуулгын оёдлын мастер,  “Үлэмж илүү” компанийн захирал Д.Лхагваатай ярилцлаа.
 
-Энэ жил хүмүүс наадмын гоёлоо хэр базааж байна вэ. Захиалга ихтэй байна уу?

-Захиалгадаа дарагдчихаад сууж байна. Үндэсний баяраараа үндэсний дээлээ өмсөхийг илүүд үзэж байгаа бололтой. Дээл хийлгэж өмсөх сонирхолтой хүмүүсийн тоо эрс нэмэгдсэн.

-Ямархуу загвартай дээл голчилж хийлгэж байх юм?

-Энгийн даавуун, торгон дээлүүдийг хийлгэж байна. Эмжээрээрээ л ялгарч байна.

-Сүүлийн үед монгол дээлнийхээ өнгөтэй ижилсүүлж малгайгаар гоёх болж?

-Ямар дээл өмсөх гэж байна түүндээ тааруулаад малгайныхаа өнгийг сонгодог болж.

-Энэ жил Үндэсний дуу бүжгийн чуулгын оёдолчид наадмын нээлтэд оролцох урлагийхны хувцсыг урлаж байгаа гэж сонссон?

-Тийм ээ. Наадмын нээлтэд нийт зургаан гоцлол дуучин оролцох юм билээ. Тэдний дээлийг урлаж байгаа. Арай дуусаагүй байна.

-Хамгийн гоё нь хэний дээл болж байна?

-Уг нь нууц л даа. Гэхдээ хамгийн гоё нь Монгол Улсын төрийн соёрхолт, дуучин Д.Болдын дээл. Улбар шар өнгөтэй, хатгамал орсон дээл болох юм. Дуурийн дуучин Б.Эрдэнэтуяа цагаан өнгийн даашинзархуу дээлээр гоёно. Сүлд чуулгын дуучин Г.Ариунбаатар гээд сайхан биетэй хүү байна лээ. Тэр хар хөх өнгийн дээл өмсөнө. Монгол Улсын гавьяат жүжигчин, дуурийн дуучин Э.Амартүвшин харин номин цэнхэр өнгийн дээлээр гоёно доо.

-Бүсгүйчүүдийн хувьд загварын дээлээр гоёх болсон. Тийм дээлийн захиалга их байна уу?

-Эгч нь бол тийм хятад маягийн дээлийг таашаадаггүй. Загварын дээлийг загварынхан л өмсөнө. Гэртээ байж байгаа монгол эмэгтэй монгол дээлээ л өмсөнө шүү дээ. Тэгээд ч тийм юм өмсчихөөд яаж сууж босох вэ дээ.