АНУ-ын ерөнхийлөгч Барак Обама өнгөрсөн лхагва гарагт Буддын шашны тэргүүн, дээрхийн гэгээн Далай ламтай хувийн чанартай уулзсан ч энэ нь Төвдийн асуудлаарх Вашингтоны байр суурийг өөрчлөхгүй гэж Цагаан ордны албан ёсны төлөөлөгч Жош Эрнест сэтгүүлчдэд мэдэгдсэн байна.

“Хэдийгээр уулзалт Цагаан ордны албан өрөөнд биш, орон сууцны хэсэгт  болсон ч  гэсэн энэ нь Төвдийн асуудлаарх АНУ-ын байр суурийг огтхон ч өөрлөхгүй гэдгийг би дахин тэмдэглэж байна. Төвд бол  биднийхээр БНХАУ-ын нэг хэсэг, АНУ хэзээ ч Төвдийн тусгаар тогтнолыг дэмжсэн мэдэгдэл хийж байгаагүй” гэж Эрнест хэлжээ.

Үүний өмнө БНХАУ-ын Гадаад хэргийн яам АНУ-ын ерөнхийлөгч Барак Обама, Далай ламтай уулзах гэж байна хэмээн мэдэгдэж байсан юм. Энэ уулзалтын үр дүнгийн тухай АНУ-ын төрийн тэргүүний хэвлэлийн нарийн бичгийн дарга  “АНУ-ын ерөнхийлөгч, дээрхийн гэгээнтэн хоёр БНХАУ, АНУ-ын хамтын ажиллагааны чухлыг тэмдэглэлээ” гэсэн байна.
Эрнест бас Барак Обама ерөнхийлөгчөөр ажилласан найман жилийнхээ хугацаанд Далай ламтай дөрөв дэх удаагаа уулзаж байна гэж онцолжээ.