БНХАУ-ын Засгийн газрын буцалтгүй тусламжийн хөрөнгөөр 60,0 тэрбум төгрөгийн өртөг  бүхий Монгол Улсад анх удаа баригдах Хөгжлийн бэрхшээлтэй хүүхдийн хөгжлийн үндэсний төвийн барилгын ажил эхлүүлэх гэрээнд өчигдөр гарын үсэг зурлаа.

Хөгжлийн бэрхшээлтэй хүүхдийн хөгжлийн үндэсний төв нь 250 ортой амбулаторын нөхөн сэргээх төв, хүүхдийн хөгжлийн хоцрогдлыг илрүүлэх, хөгжлийн бэрхшээлтэй хүүхдийн эрт сэргээн засах эмчилгээнд хамруулах, тэдэнд зориулсан энгийн ортопедийн туслах хэрэгсэл хийж өгөх, эцэг эхчүүд, гэр бүлийхэнд зориулсан сургалт зохион байгуулах зэрэг үйлчилгээ үзүүлэх аж.

Мөн сэргээн засах чиглэлийн эмч, мэргэжилтнүүд, нийгмийн ажилтан, багш нарт зориулсан сургалт, судалгаа, шинжилгээний ажлууд хийгдэх цогцолбор төв байх нь. Тус төвийн барилгын ажлыг Баянгол дүүргийн 20 дугаар хорооны нутаг дэвсгэрт ирэх сарын 31-ний өдрөөс өмнө эхлүүлж, 2,5 жилийн хугацаанд дуусган ашиглалтад хүлээлгэн өгөх аж.

Гарын үсэг зурах  арга хэмжээнд ХАХНХ-ын сайд С.Эрдэнэ, БНХАУ-аас Монгол Улсад суугаа Элчин сайд Шин Хаймин, ХАХНХЯ-ны Төрийн нарийн бичгийн дарга Г.Нарангэрэл, БНХАУ-ын Худалдааны яамны Олон улсын эдийн засгийн хамтын ажиллагааны товчооны дарга Сун Вэйрэн нар болон албаны бусад төлөөлөгч оролцсон юм.