Казахстаны иргэний агаарын тээврийн "Эйр Астана" компани энэ зургадугаар сарын 2-ны өдрөөс Астана-Улаанбаатарын хооронд нислэг үйлдэж эхлэхээр төлөвлөөд байсан ч Монголын тал татгалзсанаар энэ нислэг өнөөдөндөө эхлэхгүй бололтой. Казахстаны компани болохоор ийм нислэг хийх тухайгаа  бүр нэгдүгээр сард мэдэгдэж, монголын талаас гуравдугаар сард зөвшөөрөл авчээ. Гэтэл дөрөвдүгээр сарлд Монгол Улс үүнийг эргэж нягталъя  хэмээн татгалзсан юм байна.

Харин Казахстаны агаарын тээврийн компани болохоор Монголын талын нисэхийнхэн  ингэж татгалзсаныг ямар ч үндэслэлгүй, олон улсын иргэний агаарын  тээврийн стандарт хэм хэмжээг зөрчсөн хэрэг гэж үзэж байгаагаа илэрхийлжээ.

“Монголын талын ингэж татгалзсаныг ямар ч үндэслэлгүй гэж үзэх  хэд хэдэн шалтгаан байна. Нэгдүгээрт: Эйр Астана компани нислэг үйлдэж эхэлсэн 14 жилийн хугацаанд нэг ч улс ингэж нислэгийг нь хориглож байгаагүй. Хоёрдугаарт, манай компани нислэгийн аюулгүй байдлын аудитын шалгалтыг амжилттай өгсөн, нэг ч зөрчил гараагүй. Гуравдугаарт, Казахстан-Монголын хооронд нислэг үйлдэх олон улсын гэрээ хэлэлцээрийн шаардлагыг бүрэн хангасан” гэж “Эйр Астана”-гийн хэвлэлийн албаны мэдээлэлд дурджээ хэмээн informburo.kz сайт мэдээллээ.