Б.БААТАР

Ийм хачирхалтай асуулт дэлхийн томоохон хэвлэл мэдээллийн хэрэгслүүдээр хөвөрч эхлэв. Учир нь, Өмнөд Хятадын тэнгис, Вьетнамын хойгт нөхцөл байдал хурцдах магадлалтай болж байх шиг байна. Дайны салхи манай улс руу ойртож байна гэдэг шиг өмнөд хөрш дайнд орж магадгүй болоод байгааг ажиглагчид болон дэлхийн хэвлэл ийнхүү тайлбарлажээ.

АНУ-ын Ерөнхийлөгч Барак Обама Вьетнам улсын зэр зэвсэг худалдаалах, наймаалах эрхийг нээж байгаагаа зарласан. Өөрөөр хэлбэл Вьетнам улс олон улсын аль ч орноос зэр зэвсэг худалдаж авах эрхтэй болж байгаа юм. Ингээд АНУ зэр зэвсэг худалдаалах боломж олгосон нөхцөлийг хоёр улсын харилцааны шинэ эхлэл гэж онцлоод дайны үеийн хар өдрүүдийг аль аль нь мартах цаг нэгэнт ирсэн талаар өгүүлжээ. Цэргийн хамтын ажиллагаа явуулах таатай байдал ч үүссэнийг зарласан нь БНХАУ-ыг өдөөн хатгаж байгаа хэрэг явдал мөн билээ. Вьетнамын хойг болон Өмнөд Хятадын тэнгист шүдээ хүртэл зэвсэглэсэн бэлэн байдалтай байлдааны хөлөг онгоцнууд нэгэн рүүгээ буу шагайсан хэвээр байгаа ч улс төрийн шийдвэр тэдэнд тушаал өгөхөд дутуу байгааг сэтгүүлчид онцлов.
АНУ яагаад Вьетнам улсыг зэвсгээр хангах боломжийг нээж өгөв гэдэг нь тун энгийн. Саяхан Вьетнамын загасчдыг Хятадын тал баривчилсан ч хор хөнөөлгүй тэдэнд анхааруулга өгч, суллаж явуулсан. Арлын маргаан болон Хятад Вьетнамын одоогийн байдал нэг л өдөр хурцдах нь ойлгомжтой тул АНУ ийнхүү Вьетнамын талыг сонгож байгаа нь тодорхой боллоо гэсэн дүгнэлтийг тоймчид бичив. Хэдийгээр АНУ-ын зүгээс Вьетнамтай харилцаа холбоогоо сайжруулъя, өргөжүүлье гэж байгаа ч “дайсны минь дайсан миний найз” гэсэн бодлого явуулж байгааг Хятадын зарим сайтууд онцлов. Вьетнам улсын хувьд АНУ-тай усан хилийн орчим хамтран ажиллах, хилийн бүсийг хэрхэн хамгаалах хамтарсан сургуулилт хийх боломжтой талаар өгүүлжээ.