Хятадын Шаньдун мужийн Гуанжао гацаанд хутга барьсан этгээд дэргэдүүрээ явсан хүмүүс рүү дайрч 18 настай бүсгүйг хэвлийд нь хутгалан хөнөөгөөд зургаан цагийн дараа гацааны дунд сургуулийн барилгыг шатаасан хэрэг гарсан байна. Түймрийн улмаас нэг сурагч амь алдаж, гурван ч хүүхэд түлэгдэж бэртжээ.

Гэмт этгээд энэ үйлдлээ ингээд зогсоосонгүй 40 минутын дараа хоёр ч сурагчийг хутгалж гэмтээгээд хэргийн газраас зугтаж нуугдсан байна.

Цагдаагийнхан энэ гэмт этгээдийг 26 настай Ши Зюньфэн гэгч болохыг тогтоосон ч одоо болтол барьж чадаагүй байна. Ийм болохоороо түүний байгаа газрыг мэдээлсэн хүнийг 50 мянган юаниар шагнана гэж зар тараажээ. Харин түүнийг барьж цагдаагийн байгууллагад өгсөн хүнийг 200 мянган юаниар урамшуулах юм байна.