Германы канцлер Ангела Меркелийн Штральзунд дахь албан өргөөний үүдэнд хэн нэгэн гахайн толгой тавьж, өдөөн хатгасан бичвэр үлдээснийг цагдаагийн байгууллага шалган буруутныг эрж байна.
Хууль сахиулагчдын мэдээлснээр бол бямба гаригийн өглөөгүүр эргүүл хийж явсан цагдаа нар үүнийг илрүүлсэн гэнэ. Бичвэр дээр юу гэж байсныг цагдаагийнхан хэлээгүй ч канцлерт хаяглаж, түүнийг доромжилсон  байсан гэжээ.
Хууль сахиулагчид одоо энэ хэргийг ХБНГУ-ын канцлерыг доромжилсон, амьд амьтныг хөнөөсөн хэмээн мөрдөн шалгаж эхэлсэн байна.
Цагаачдын асуудлаар Ангела Меркелийн баримталж байгаа бодлогын улмаас Германд Ойрхи дорнодын орнуудаас сая гаруй дүрвэгч ирснээр иргэд түүнд итгэл алдарч нэр хүнд нь эрс унаад байгаа юм.
Өнгөрсөн гуравдугаар сард  болж өнгөрсөн орон нутгийн сонгуулиар гэхэд л Ангела Меркелийн тэргүүлдэг “Христианы ардчилсан нам” орон нутгийн 16 мужаас гуравт нь амжилт үзүүлж чадалгүй ялагдсан юм.