Сонгинохайрхан дүүргийн ИТХ өнгөрсөн баасан гарагт хуралдаж, Засаг дарга М.Чинболдыг огцруулах эсэх асуудлыг хэлэлцсэн байна. Тус дүүргийн ИТХ дахь МАН-ын бүлэг санал оруулсныг авч хэлэлцсэн аж. Гэвч Ардчилсан намын бүлгийн төлөөлөгчид энэ хурлыг орхин гарчээ. Ингээд МАН-ын бүлгийн 20, МАХН-ын 2 төлөөлөгч үлдсэн байна. Засаг даргыг огцруулах асуудлыг МАН-ын бүлэг хүч түрэн оруулж, зохион байгуулсан гэж үзэн АН-ын бүүлэг хурлыг орхиж гарсан шалтгаанаа тайлбарласан. Ирц хангалтгүй байсан, хүчингүй хурлаар Засаг даргыг огцруулах асуудлыг шийдсэн байх магадлалтай гэлээ. Тэгэхээр шийдвэр нь хүчин төгөлдөр эсэхийг мөн хөндөж байгаа юм.  
Ерөнхий сайд Ч.Сайханбилэг бүх орон нутгийн ИТХ-ын дарга, төлөөлөгчидтэй уулзахдаа “Засаг дарга огцруулах албан бичиг хүлээж авахгүй, ажлаа хийцгээнэ шүү” хэмээн анхааруулж байсан билээ. Огцруулах бичгээ Нийслэлийн Засаг дарга Э.Бат-Үүлд Сонгинохайрхан дүүргийн ИТХ-аас өргөн барилаа ч хүлээж авах нь эргэлзээтэй гэсэн үг.