УИХ-ын 15 дугаар тойрог Увс аймагт МАН-аас нэр дэвшигч Д.Чойжилсүрэн, Ч.Хүрэлбаатар нар сонгогчдод мөнгө тараасан тухай мэдээлэл баримттайгаа цацагдсан. Манай сайт энэ мэдээллийн дүрс бичлэгийг олон нийтэд анх мэдээлсэн билээ. Тэдний энэ хууль бус үйлдэлд иргэд, сонгогчдоос гомдол ирсний дагуу мөнгө тараасан асуудлыг Увс аймгийн сонгуулийн хороо өчигдөр хэлэлцсэн байна. Хуралдааныг өнөөдөр өглөө болтол хойшлуулсан ч сонгуулийн хороо МАН-ын хоёр нэр дэвшигчийг жагсаалтаас хасахгүй гэсэн шийдвэр гаргажээ. Тиймээс энэ шийдвэрийг дахин нягтлуулж, шалгуулахаар Сонгуулийн ерөнхий хороонд хандаж байгаа аж. СЕХ одоогоор энэ талаар албан ёсоор ямар нэг мэдээлэл өгөөгүй байна. Хэрэв тэдний хууль бус үйлдлийг хууль хяналтын байгууллага буруутайд тооцвол Эрүүгийн хуулиар шийтгэвэл төрийн эсрэг гэмт хэрэг хэмээн үзэж, 82 дугаар зүйлээр шийтгэж, 16-20 жилийн хугацаатайгаар хорих ял оноох ёстой хэмээн заасан аж.  
Харин УИХ-ын сонгуулийн тухай хуульд нэр дэвшигч мөнгө тараасан нь нотлогдвол бол хөдөлмөрийн хөлсний доод хэмжээг 3-5 дахин нэмэгдүүлсэнтэй тэнцэх мөнгөн торгууль ногдуулах юм байна.