Баянгол дүүрэг 25 дугаар тойрогт УИХ-ын сонгуульд нэрээ дэвшүүлж байгаа жижиг намуудын төлөөлөл хэвлэлийнхэнд хандлаа. Тодруулбал, тус дүүрэгт Монголын Ногоон нам, Монголын Социал Демократ нам, Хөгжлийн төлөөх нам гэх мэт зургаан нам, нэг эвслийн нэр дэвшигчид хамтарч ажиллаж байгаа гэнэ.
Өөрсдийгөө жижиг намуудын төлөөлөл хэмээн нэрлэж буй тэд энэ удаагийн сонгуулийг дахиад царцааны нүүдэлтэй, луйварын сонгууль болно гэдгийг ч мэдэгдсэн юм. Түүнчлэн Баянгол дүүргийн 25 дугаар тойрогт л гэхэд сонгогчдын нэрсийн жагсаалтыг илүү бичсэн тохиолдол гарсан гэнэ. Энэ талаар Сонгуулийн ерөнхий хороонд мэдэгдэхээр болсноо ч хэвлэлийн хурлын үеэр хэвлэлийнхэнд дуулгалаа.
Тэд МАНАН амлалтаа биелүүлэхийн төлөө улсын төсвийн мөнгийг зүй бусаар зарцуулж, томоохон бүтээн байгуулалт, зам, барилгын ажил санхүүжилтгүй болсон, татвар төлөгчийн мөнгөөр ахмад настан, хөгжлийн бэрхшээлтэй иргэдэд 330 мянган төгрөг тарааж эхэлсэн хэмээн ч шүүмжилсэн юм.