Төрийн албаны зөвлөлд шалгалт өгөх хүсэлт гаргасан хүмүүсээс маргааш сорилын шалгалтыг цахим хэлбэрээр авах гэнэ. Тус албанд бүрдүүлж өгсөн баримт бичиг нь шаардлага хангасан нийт 44 хүнээс шалгалт авахаар болжээ. Тэдгээр нь Засгийн газрын агентлагт гараад буй орон тоонд шалгалт өгөх юм байна. Цөмийн энергийн газарт гэхэд 13 хүн, Үндэсний статистикийн хороонд долоо, Санхүүгийн зохицуулах хороонд хоёр, Газрын тосны газарт найм, Төрийн өмчийн хороонд зургаа, Татварын ерөнхий газарт хоёр, Жендерийн үндэсний хороонд хоёр, Архивын ерөнхий газарт гурав, Автозамын газарт нэг хүн шалгалт өгөх ёстой аж. Шалгалт өглөөний 8, 10 цагт эхлэнэ. Хоцорсон бол оруулахгүй гэнэ. Төрийн албаны зөвлөлд тухайн байгууллагаас ажлын байрны захиалга ирүүлсэн тохиолдолд сонгон шалгаруулалт зарладаг. Тэр дагуу нь дээрх хүмүүсээс төрийн албаны шалгалт авч, түүн дундаас тэнцсэн хүмүүсээс сонгон шалгаруулж тухайн хүсэлт тавьсан агентлагт санал болгодог юм байна.