Монгол Улсын Ерөнхийлөгч Ц.Элбэгдорж БНХАУ-ын Бээжин хотод энэ сарын 6, 7-нд болж буй Шанхайн хамтын ажиллагааны байгууллагын гишүүн орнуудын Төрийн тэргүүн нарын зөвлөлийн XII хуралдаанд оролцож байна. Өчигдөр эхэлсэн нээлтийн ёслолд Монгол Улсын Ерөнхийлөгч Ц.Элбэгдорж ОХУ-ын Ерөнхийлөгч В.Путин, Казахстан Улсын Ерөнхийлөгч Н.Назарбаев, Афганистан Улсын Ерөнхийлөгч Х.Карзай, Узбекстан Улсын Ерөнхийлөгч И.Каримов зэрэг төрийн тэргүүнтэй  уулзаж, хоёр талын харилцаа, хамтын ажиллагаа болон хуралдаанаар яригдах асуудлуудаар санал солилцжээ. Энэхүү зөвлөлийн хуралдаанаар гишүүн орнууд Мөнхийн энх тайван, хамтын хөгжил цэцэглэлтийн бүс нутгийг байгуулах тухай Тунхаглал, ШХАБ-ын дунд хугацааны хөгжлийн стратегийн үндсэн чиглэл, Бүс нутгийн энх тайван, аюулгүй байдал, тогтвортой байдалд занал учруулах үйл явдлын үед авах улс төр, дипломатын арга хэмжээ болон механизмын журам зэрэг хэд хэдэн баримт бичигт гарын үсэг зурах төлөвтэй байна.