Гэр хорооллын 7241 иргэн амины орон сууцтай болох төсөлд хамрагдана
Улаанбаатар хотын иргэдийн эрүүл аюулгүй, тохилог амьдрах орчинг бүрдүүлэх, газар ашиглалтыг сайжруулах, гэр хорооллыг инженерийн болон нийгмийн дэд бүтэцтэй амины орон сууцны хороолол болгон хөгжүүлэх үйл ажиллагааг иргэдийн оролцоотойгоор газар шинэчлэн зохион байгуулах зорилгоор нийслэлийн ИТХ – ын 23/02 дугаар тогтоолоор баталсан “Гэр хорооллын газрыг шинэчлэн зохион байгуулах үйл ажиллагааны журам”, нийслэлийн Засаг даргын 2013-2016 үйл ажиллагааны хөтөлбөрийн дагуу эхний ээлжинд нийслэлийн 6 дүүргийн 8 байршилд Газар шинэчлэн зохион байгуулж, амины орон сууцтай болох төсөл хэрэгжүүлж эхлээд байна.

Энэхүү ажлын хүрээнд нийслэлийн Засаг дарга бөгөөд Улаанбаатар хотын Захирагч Э.Бат-Үүл уг төслийн талбарт хамрагдаж байгаа иргэдтэй биечлэн уулзаж санал бодлыг нь сонссон бөгөөд өнөөдөр тус төсөлд хамрагдаж буй нийт 8 байршлын иргэдтэй уулзлаа.

Уулзалтын үеэр нийслэлийн Засаг дарга бөгөөд Улаанбаатар хотын Захирагч Э.Бат-Үүл “Та бүхэн өөрийнхөө, үр хүүхдийнхээ ирээдүйн сайн сайхан амьдралын төлөө газар шинэчлэн сайжруулах үйл ажиллагаанд санаачилгатай, идэвхитэй оролцож байгаад таатай байна. Улаанбаатар хотыг агаар, хөрсний бохирдолгүй, орчны доройтолгүй болгох цорын ганц арга зам бол гэр хорооллыг тохилог орон сууцны хороолол болгох юм. Гэр хорооллын газрыг шинэчлэн зохион байгуулж, иргэдийг амины орон сууцтай болгох энэхүү үйл явц бол маш амаргүй ажил. Тийм ч учраас уг ажлыг бүү улс төржүүлээрэй гэдгийг дахин дахин хэлмээр байна” гэлээ.

№	Төслийн талбарын байршил	ИТЗ-ийн нэр	Талбайн хэмжээ /га/	Нэгж талбарын  тоо	Хүн ам	Иргэдийн бүлгийн тоо
1	БЗД, 19-р хороо, Цайз зах орчим	“Цайз хотхон”	12,0	184	717	8
2	БЗД, 27-р хороо, Дарь-Эхийн шинэ буудал орчим	“Дарь-Эх хотхон”	16,0	258	1568	9
3	СБД, 13-р хороо, Таван буудал орчим	“Есөн Эрдэнэ”	9,74	183	752	5
4	ЧД 17-р хороо, Хуучин эцэс орчим	“Ивээл”	9,2	96	314	5
5	БГД 23-р хороо, Хөтөл орчим	“Шинэ шийдэл”	9,86	149	788	8
6	ХУД 9-р хороо, 107-р цэргийн анги орчим	“Нарлаг Буянт-Ухаа”	18,4	212	848	6
7	СХД, 11-р хороо, Хөтөл орчим	“Эхлэл”	9,8	150	590	6
8	СХД, 23-р хороо, Хангай зах орчим	“Оргил”	24	313	1664	8
	Нийт	8	109	1545	7241	55