Сүхбаатар дүүргийн шүүх “долдугаар сарын 1”-ний хэрэгт холбогдсон цагдаагийн экс дарга нарын хэргийг Ганц худагийн урьдчилан хорих төвд өнөөдөр 10:00 цагаас хийхээр товлоод байгаа. Гэвч шүүх хурал дахин хойшлох бололтой. Учир нь, шүүгдэгч НЦГ-ын дарга асан хурандаа Д.Зоригт хэд хоногийн өмнө зүрхний хагалгаанд орсон учир бие нь тааруу байгаа гэнэ. Түүний бие гэнэт муудсан учир өнгөрсөн даваа гаригт хорихын эмнэлгээс Клиникийн гуравдугаар эмнэлэг рүү шилжүүлжээ.

Түүнчлэн шүүгдэгч нар бас өмгөөлөгчгүй болчихоод буй. ЦЕГ-ын даргын үүрэг гүйцэтгэгч асан хошууч генерал Ч.Амарболд л гэхэд хамгийн хуульч С.Нарангэрэлийг өмгөөлөгчөөрөө сонгох хүсэлтээ Нийслэлийн өмгөөлөгчдийн зөвлөлд хүргээд байсан юм. Гэвч С.Нарангэрэл түүнийг өмгөөлөхөөс татгалзсан байна. Учир нь, тэрээр МҮАН-МАХН-ын “Шударга ёс” эвсэлээс сонгуульд нэрээ дэвшүүлэхээр болсон тул ямар ч завгүй гэжээ.
Тэгэхээр шүүгдэгч нар өмгөөлөгчгүй, зарим нь бие тааруу гэсэн шалтгаанаар шүүх хуралд очихгүй. Тиймээс шүүх хурал энэ удаад дахин хойшлох нь гэсэн мэдээллийг албаны эх сурвалж өглөө.