Орхоны аймгийн Засаг дарга асан Д.Оюунбат ХЭҮК-т ханджээ Тэрээр дөрвөн сарын өмнө эрх мэдэл, албан тушаалаа урвуулан ашиглан, төсвийн мөнгийг завшсан хэрэгт унаж, “Бүгд найрамдах” уншуулсан. Тодруулбал, Баянзүрх дүүргийн шүүх түүнд гурван жил зургаан сар хорих ял оноож, төрийн албанд ажиллах эрхийг нь хоёр жилээр хасах шийдвэр гаргасан юм. Гэвч тэрээр үүнийг хүлээн зөвшөөрөхгүй Нийслэлийн шүүхэд давж заалдсан боловч уг ялыг хэвээр үлдээсэн билээ. Харин хяналтын шат буюу Улсын Дээд шүүхэд гомдол гаргасныг хэд хоногийн өмнө хэлэлцэж, Д.Оюунбатыг цагаатгах тогтоол гаргасан. Тиймээс тэрээр шүүхийн эл тогтоолыг үндэслэж, хэдэн сар шоронд хоригдож, эрүүл мэнд, сэтгэл санааны асар их хохирол амссан хэмээн Хүний эрхийн комисст гомдол гаргасан байна.