Хүн хөл гартаа тус бүр 10 хуруутай, нийт 20 хуруутай л байдаг. Гэтэл хавчааран хөлтэй гэх юм уу, хөлдөө ердөө хоёрхон хуруутай хүмүүс амьдардаг гэсэн яриа гарсаар байдаг ч олж үзсэн хүн ховор байж. Харин ойрмогхон аялагч судплаачид Ботсван, Өмнөд Родезийн хил заагаар нутагладаг Ботсваны Франсистаунаас 50 км зайд орших энэ сонин омгийнхонтой уулзаж зургийг нь авсан байна.
Вадома гэдэг энэ омогт хэдэн зуун хүн л амьдардаг гэнэ. Тэд ердөө мал  маллаж гадаад ертөнцөөс үндсэндээ тусгаар амьдардаг юм байна. Энд төрж байгаа хүүхдүүд хоёр янз, нэг хэсэг нь ерийн л хүн шиг таван хуруутай төрдөг бол нэг хэсэг нь ердөө хоёрхон хууруутай хөл нь яг л хавчны ам шиг харагддаг байна.

Таван хүүхдийнх нь хоёр нь ердийн хөлтэй, гурав нь хоёр хуруу бүхий хөлтэй гэр бүлийн өрхийн тэргүүн Мхахлани Малисе “Би жаахан байхдаа надад ер бусын ямар нэгэн шинж байгаа гэж огт боддоггүй байсан. Миний ээж, төрөл төрөгсөд минь бүгд хөлдөө хоёр хуруутай байсан болохоор тэр. Би яг л зарим үхэр эвэртэй, зарим нь эвэргүй байдаг шиг хүмүүсийн зарим нь хөлдөө таван хуруутай, зарим нь хоёр хуруутай байдаг юм байна гэж боддог байлаа. Хөлдөө таван хуруутай байлаа гээд хүн надаас илүү юм ер байхгүй. Бүхий л насаараа би бүхнээс хүчтэй байсан. Франсистаун руу явган яваад л буцаад ирдэг шүү дээ” гэж ярьж байна.

Бүүр эрт цагт манай тосгонд нэгэн бүсгүй хөлдөө хоёр хуруутай хүүхэд төрүүлэхэд хүмүүс ихэд айж муу ёр, ад шулам гээд хүүхдийг нь алсан гэдэг. Дараа нь өнөөх эмэгтэй бас хүүхэд төрүүлж тэр нь бас л хоёр хуруутай хөлтэй байжээ. Гурав дахь хүүхэд нь ч бас. Ингээд л тосгоныхон хүүхдийг амьд үлдээж. Ингэж л манай тосгонд хоёр хуруутай хөл бүхий хүн бий болсон гэдэг. Одоо манай тосгонд хөлдөө хоёр хуруутай хүн 50 орчим бий гэж тэр ярьж байна.
Таван хүүхдийнх нь гурав нь хөлдөө хоёр хуруутайн тухайд Малисе “Тэдний хөл ямар байх нь надад хамаагүй. Хамгийн гол нь би таван хүүхэдтэй. Хөлдөө хэдэн хуруутай байх нь надад ч, манай тосгоны хэнд ч гэсэн нэг их сонин биш” гэжээ.

Гэтэл бас хамгийн бага хүү Бембы нь зүүн гартаа яг хөл шигээ хоёрхон хуруутай төрсөн гэнэ.
Юутай ч ийм нэгэн сонин хүмүүс Ботсванад амьдарч байна. Хэтэрхий цөөхөн хүн амтай болохоор төрөл садангууд өөр зуураа гэрлэж цус ойртсоноос  болдог ч байж болох.