Мөнгөн дэвсгэртийг хуурамчаар үйлдэж байгаа хүн аль болох ялгагдахааргүй хийхийг л эрмэлздэг, ийм ч болохоор тэр нь гүйлгээнд орсон хойноо илэрч баригддаг. Гэтэл Канадын 22 настай Касс Альдер тийм хянуур биш нэгэн  гэнэ. The Guardian сонинд мэдээлснээр тэрээр зүгээр л ам арчдаг цаас ашиглаж канадын 100 долларын дэвсгэрт хийсэн байсан гэнэ. Тэр мөнгөн дэвсгэртийн дүрсүүдийг ам арчдаг цаасаар урлаад түүнийгээ энгийн цаасан дээр наасан байж. Тэрээр үүнийгээ тайлбарлахдаа ингэж наасныхаа дараа хийн зууханд хэсэг хугацаагаар хийж хатаасан гэжээ.
Ингээд өөрийнхөө бүтээл мөнгөө авч хүнсний дэлгүүрт очин худалдаа хийгээд мөнгөө тушаахад нь мөнгө хураагч түүний бүтээлийг хараад л хуурамч болохыг нь таньсан байна. Тэгэхээр нь Альдер “мөнгө”, бараагаа хаяад зугтаасан ч хуулийнхны гараас мултарсангүй.
Одоо түүнийг улсын мөнгөн тэмдэгчтийг хуурамчаар үйлдсэнийх нь төлөө 18 сарын хорих ял хүлээж байна.