“Гал үндэстэн” холбооны тэргүүн Ц.Мөнхбаяр өөрийн итгэмжлэгдсэн төлөөлөгч Д.Ганболдоор дамжуулан Монгол Улсын Ерөнхийлөгч Ц.Элбэгдоржоос уучлал хүссэн тухайгаа олон нийтэд зарлалаа. Тэрээр уучлал хүсэж байгаа тухай захидлаа энэ сарын 17-ны өдөр өөрийн гараар бичсэн бөгөөд “Өмнө нь хоёр ч удаа Ерөнхийлөгчид захидал хүргүүлсэн ч эзэндээ хүрээгүй гэж үзсэн учраас энэ удаад олон нийтэд мэдээлж байгаа”  гэж Ц.Мөнхбаярын итгэмжлэгдсэн төлөөлөгч хэллээ. Мөн тэрээр “Ц.Мөнхбаяр, Д.Төмөрбаатар болон Г.Болдбаатар нарт уучлал үзүүлээсэй гэж хүсэж байна. Г.Болдбаатарын эрүүл мэндийн байдал хүнд байгаа. Ерөнхийлөгч маань уужуу тайван хандаж, дахин энэ асуудалд анхаарал хандуулна гэдэгт итгэж байна. Тиймээс Ц.Мөнхбаярын гурав дахь захидлыг бид өнөөдөр албан ёсоор хүргүүлж байгаа юм” гэж ярьсан юм.   
Ц.Мөнхбаяр, Д.Төмөр­баатар нарын өмнөх уучлал хүссэн захидлын хариуг Ерөнхийлөгчийн  Хүний эрх, Хуулийн бодлогын зөвлөх Ч.Өнөрбаяр өгч байсан юм. Тэрхүү захидлын хариу мэдэгдэлд “…Монгол Улсын Үндсэн хуулийн 49.1 дэх хэсэг “Шүүх хараат бус байж, гагцхүү хуульд захирагдана”. Мөн хуулийн хоёр дахь хэсэгт “Ерөнхийлөгч, Ерөнхий сайд, Улсын Их хурлын ба Засгийн газрын гишүүн, төр, нам, олон нийтийн бусад байгууллагын албан тушаалтан, иргэн хэн боловч шүүгчээс шүүн таслах үүргээ хэрэгжүүлэхэд хөндлөнгөөс оролцож болохгүй” гэж заасны дагуу Монгол Улсын Ерөнхийлөгч шүүхийн үйл ажиллагаа, шүүгчийн хараат бус байдалд хөндлөнгөөс нөлөөлөх боломжгүй юм” гэж бичсэн байдаг байна. Үүнийг Ц.Мөнхбаярын бие төлөөлөгч “Шүүхийн процесс нэгэнт болоод өнгөрсөн хэрэгт уучлал хүсч байхад шүүхэд нөлөөлөх боломжгүй зэргээр бидэнд буруу тайлбар өгсөн” гэж үзэж байна гэв.

“Гал үндэстэн” холбооны тэргүүн Ц.Мөнхбаяр (долоон жил), Г.Болдбаатар (зургаан жил 11 сар) болон Д.Төмөрбаатар (10 жил 10 сар) нар өнгөрсөн оны зургадугаар сараас хойш ШШГЕГ-ын харьяа Хархорин дахь хорих 423 дугаар ангид ял эдэлж байгаа юм. Тэд Засгийн газраас УИХ-д өргөн барьсан хуулийн төслийг хагас цагийн дотор УИХ-аас татаж авахуулах, өөрсдийн боловсруулсан “Хуулийн хэрэгжилтийг хангах тухай” Засгийн газрын тогтоолын төслийг нэг цагийн дотор батлуулах шаардлага тавьсан. Ингээд шийдвэр гаргуулахад шууд нөлөөлөх зорилгоор 2013 оны есдүгээр сарын 16-ны өдөр “Централ” тауэр, “Уул уурхайн” яамны гадна тротил буюу тэсэрч дэлбэрэх бодис байрлуулан, улмаар Төрийн ордны хашаан дотор буу, сум, гранат зэрэг галт зэвсэг, байлдааны галт хэрэгсэл хэрэглэн олон нийтэд айдас төрүүлэхэд чиглэсэн нийтэд аюултай хүч хэрэглэсэн буюу хүч хэрэглэхээр заналхийлсэн гэсэн зүйл ангиар шийтгэгдсэн юм.